Urriaren 1ean Kontadoresek udazken-neguko laborategietako izen-emateak irekiko ditu

18-30 urte bitarteko gazteei zuzendutako 68 plaza eta 6 kultur laborategi

Gazteentzako hainbat ikastaro programatu ditu Kontadoresek: 68 plaza eta 6 kultura-laborategitan aritzeko aukera, urritik otsailera bitartean. Gazteen interesak, beharrak eta gustuak kontuan izanda osatu da programazioa, eta, eskaini ere, haien poltsikora egokitutako prezioan.

Laborategien artean, nabarmentzekoak dira norbere sormenari eskainitako espazioak: Komiki laborategia, Sorgin bilkura sormen-gunea eta Hitza ematen dizut idazketa tailerra. Halaber, Dancehall eta Zeramika laborategiak hartuko ditu berriro Kontadoresek, eta gorputzari eskainitako lekua indartzeko, Gorputz-kontzientzia eta malgutasuna lantzeko aukera ere izango da udazken-negu honetan. Laborategietan zehar, nork bere burua ezagutzeko, taldean gozatzeko eta sormen-prozesuak partekatzeko aukera izango dute parte-hartzaileek.

Parte hartzeko irizpideak

18 eta 30 urte bitarteko gazteentzako dira ikastaroak, eta Donostian erroldatutakoak izango dira aurrena. Dena dela, eskaintza adin tarte horretarako diseinatuta dagoen arren, tokirik geratzen bada eta beste pertsona batzuek ere parte hartzea egoki bada, 18 urte baino gutxiago eta 30 urte baino gehiago dutenek ere izango dute laborategietan parte hartzeko bidea.

Izen-emateak urriaren 1etik aurrera, webgune honen bidez: www.kontadores.eus
Info +
Kontadores Gazte Zentroa
Pasai San Pedro, 13. Bidebieta (San Sebastián)
943 48 34 76
kontadores@donostia.eus