Alerta Laranja itsasaldeko arriskuagatik: Nabigazioa lehenengo bi milietan 00etatik 18etara ordu lokala. Olatuen altuera adierazgarria 5-6 m ingurukoa izango da. Iparmendebaldeko hondoko itsasoak 4-4.5 m inguruko olatuak altxatuko ditu. Olatuen arteko periodoa: 16-17 s. Ipar-mendebaldeko haizea ibiliko da, 7ko indarrarekin, eta itsaso oso zakarra eragingo du.
Alerta Laranja elurragatik barnealdean 500 m-tik gora 00etatik 24etara ordu lokala. Goizaldean elur-kota 600 m inguruan egongo da eta goizean zehar 400 m-ra jaitsiko da. Elur-kota noizbehinka beherago egongo da ekaitz-guneetan. Zaparrada txiki-ertainak botako ditu, sarriago eta ugariago egunaren lehenengo partean. Kantauri isurialdean trumoi-ekaitzak izango dira eta txingorra botako du. Aurreikusitako lodierak: 15-50 cm 1000 m-ra, 5-25 cm 600 m-ra, 0 cm 200 m-ra.
Gomendioak
Hona hemen Eusko Jaurlaritzako Larrialdiei Aurre Egiteko eta Meteorologia Zuzendaritzaren aholkuak denboraleak gertatzen direnerako, ondorio txarrik ez izateko, edo ahalik eta gehien murrizteko:
Prebentzioko neurriak:
Ez bainatu urruneko hondartzetan, behar beste ezagutzen ez dituzunetan edo zaintza eta salbamenduko zerbitzurik ez daukaten hondartzetan.
Ezta olatu handiak edo tirain handia dagoen lekuetan ere ez.
Urrundu olatuak lehertzen diren lekuetatik (haitz, kai-mutur, moila…).
Ez hurbildu itsas pasealeku, kai-mutur edo itsas labarretara. Uraren indar handiak eraman egin zaitzake.
Ez joan ibilgailuz kostako errepideetan.
Urpekaritza egitekoa bazinen, utzi beste baterako.
Saiatu ontzirik ez erabiltzen, eta begiratu zurea ondo amarratuta dagoen. Ez egin uretako kirolik, ezta inondik ere.
Larrialdietan hartu beharreko neurriak:
Itsasora erortzen bazara, urrundu olatuak lehertzen diren lekutik, laguntza eskatu eta itxoin erreskatatu arte.
Olatuek eramaten bazaituzte, lasai egon, eta ez egin igeri korrontearen kontra; kostako korronteek indarra galtzen dute tarte batzuetan.