"Donostia xahuketarik gabe": udalaren proiektu bat, jana alferrik galtzeari kontra egiteko.

Jana alferrik galtzea zerari esaten diogu: artean ere pertsonak jateko moduan izan arren aprobetxatzen ez den janari. Jana bazterrean uztea eta botatzea horniduraren etapa guztietan gertatzen da: ekoizteko orduan, kontsumitzekoan, banatzekoan, saltzekoan eta kozinatzekoan.

Europako Elkarteak jotzen du ekoiztutako janariaren % 20 alferrik galtzen dela Europan, eta honela banatzen dela hori elikadura katean: % 11 ekoiztekoan galtzen da, % 19 prozesatzekoan, % 5 salerostekoan, % 12 zerbitzu sektorean eta % 53 etxeetan.

Gestio txar horrek dirua galtzea dakarkie elikaduraren katean parte hartzen duten eragile guztiei; azkeneko kontsumitzaileei batez ere. Baina, ez hori bakarrik: ingurumenari ere asko erasaten dio; izan ere, baliabide batzuk kontsumitu eta isuri batzuk egiten baitira janariak ekoiztekoan, banatzekoan eta hondakinak kudeatzekoan.

Alde horretatik, hor dugu 2030 Agendako garapen sostengagarriaren 12. helburua, kontsumo eta ekoizpen sostengarriaren gainekoa: 2030erako erdira jaistea munduan pertsonako alferrik galtzen den jana, txikizka saltzen denean eta kontsumitzaileek erosteko orduan, eta orain baino jan gutxiago galtzea ekoizpen eta hornidura kateetan ere.

Donostia xahuketarik gabe

Donostia xahuketarik gabe Eusko Jaurlaritzak diruz lagundu eta Donostiako Udaleko Ingurumen Zuzendaritzak abian jarri duen ekimen bat da, janik alferrik ez galtzeko hiriko sektore batzuetan, oso praktika samur batzuk eginda.

Udalak bereizgarri bat ematen die baldintza batzuk betetzen dituzten establezimenduei, bistan jartzeko. Bereizgarri hauxe:

JATETXEAK

Nola galdu dezakegu janari gutxiago alferrik gure jatetxean?

Jatetxeentzako gida honek jana alferrik ez galtzeko neurri batzuk proposatzen ditu, eta hiriko jatetxe batzuetan alde horretatik ondo egiten dituzten gauza batzuk ere ikus daitezke, besteentzako ikasbide bat izateko.

Nola eskuratu daiteke DONOSTIA XAHUKETARIK GABE bereizgarria?

DONOSTIA XAHUKETARIK GABE bereizgarria lortzeko baldintza hauek, behintzat, bete behar ditu jatetxeak:

• Hondakin frakzio guztiak ondo bereiztea, baita bio-hondakina ere.
• Janik alferrik ez galtzeko balio duen neurri bat, behintzat, hartzea. Gutxienez, janari soberakinak etxera eramatea eskaini behar zaie bezeroei.
• Iturriko ura doan eskaintzea.
• Hartutako prebentzio neurriak erabiltzen erakustea langileei.

Baldintza horiek betez gero, Donostiako Udaleko Osasun eta Ingurumen Zuzendaritzara jo daiteke, 943483390 telefonora hots eginda, edo ingurumena@donostia.eus helbide elektronikora idatzita.

Donostia xahuketarik gabe bereizgarria duten jatetxeen zerrenda orriaren bukaeran ikus dezakezu.

ELIKAGAI-KOMERTZIOAK

Nola galdu dezakegu janari gutxiago alferrik gure komertzioan?

Elikagai-komertzioetarako gidaliburu honetan, elikagai-hondakinak sortzearen aurka borrokatzeko zenbait neurri proposatzen da.

Nola eskura daiteke DONOSTIA XAHUKETARIK GABE bereizgarria?

DONOSTIA XAHUKETARIK GABE bereizgarria lortzeko, gutxienez, ondorengo baldintzak bete ehar dituzte elikagai-komertzioek:

• Janik alferrik ez galtzeko balio duen neurri bat, behintzat, hartzea. Hor ditugu, adibidez: establezimenduko zona bat "azken minutuko" produktuetarako erabiltzea; soberakinei irteera ematea, berariaz horretarako diseinatutako aplikazioen bitartez; edota, soberakinak ematea.
• Hondakin mota guztiak ondo bereiztea, biohondakina barne.
• Langileei hartzen diren prebentzio neurrien berri ematea, eta horretan trebatzea.

Baldintza horiek betez gero, Donostiako Udaleko Osasun eta Ingurumen Zuzendaritzara jo daiteke, 943483390 telefonora hots eginda, edo ingurumena@donostia.eus helbide elektronikora idatzita.

ETXEAK

Nola galdu dezakegu janari gutxiago alferrik gure etxean?

Etxeetarako txosten honek hainbat neurri proposatzen du, janari alferrik galtzea saihesteko.

DONOSTIA XAHUKETARIK GABE bereizgarria duten jatetxeak:

​​​​​​​