Kultur Aniztasunaren Arloa

Donostia oso jende anitzeko hiria da. 130 herrialdetako herritarrek osatzen dute (2017ko errolda), bakoitza bere kultura eta ohiturekin, eta hizkuntza mordo bat ere hitz egiten da.

Horrela, elkar ezagutzea eta elkarrekin bizitzea sustatzea funtsezkoa da hiri irekia eta sendoa eraikitzeko.

Errealitate hori ikusita, 2013ko ekainean, Kultura Aniztasunaren Bulegoa sortu zuen Udalak, herritar guztien hizkuntza, kultura, aukera-berdintasuna eta eskubide sozial eta politikoak bermatu ahal izateko, kultura-aniztasuna abiapuntutzat hartuta.

Elkarren errespetuan eta aintzatespenean oinarritutako harremanak eraikitzea da helburua, kultura eta hizkuntza guztiak kontuan hartuta, elkar ezagutzea eta elkarreragina bultzatuz eta aniztasunaren balio positiboa azpimarratuz. Horregatik, hirian diren kulturak eta jatorriak kudeatzeko orduan, kulturartekotasun-ereduan oinarritzen da Donostiako Udala; hau da, kultura guztiak errespetatzetik abiatu eta, kultura guztiak berdin tratatu eta kultura batek besteek baino botere gehiago izan gabe, kulturarteko harremanen oinarria jartzea, elkar ezagutzea eta errespetatzea bitarte direla.

Alde horretatik, migratzaileek eskubide osoa dute beren kulturari eta hizkuntzari eusteko, bai eta tokiko kultura eta hizkuntza ezagutzeko eta errespetatzeko ere. Desberdintasunak berdintasunean bizitzeko modua eman behar da.