Ekintzak

Igantetako alboradak

Udal bandak herritarrei ematen dizkien zerbitzuen artean, igande goizetako alboradak dira donostiarrei gehien gustatzen zaizkienetakoak. Txistulariek berek honela kontatzen digute: "Goizeko bederatziak laurden gutxitan batzen gara eta bederatzietan puntuan hasten gara erronda egiten. Gutxi gorabehera, ordu eta laurdenez aritzen gara zortzikoak jotzen. Parte Zaharrean hasten gara, Portu eta San Jeronimo kaleen arteko izkinan. Parte Zaharrean barrena ibili eta gero, Erdialdeko oinezkoen aldea zeharkatzen dugu, Artzain Onaren Katedralaren atzealderaino. Bertatik, Errege-erregina Katolikoen kaletik hain zuzen, Parte Zaharrera itzultzen gara. Han amaitzen da gure ibialdia, Konstituzio plazan.

Eguraldi txarra dagoenean, Parte Zaharrean baino ez dugu jotzen. Eta euri jasa handia dagoenean, Konstituzio plazako arkupeetan soilik. Nolanahi ere, beti saiatzen gara ahalik eta ibilaldirik handiena egiten eta, benetan, edozein zirimirik ez gaitu beldurtzen. Maiz, egin dugu, euriak oztopatu gaituenean, etxeen ertzetatik ibili jo gabe eta aterpeak bilatuz, hainbat geldialditan zortzikoa jo.

Egokiera berezi batzuetan ordutegia aldatu egiten da. Esate baterako, auzoetara joaten garenean, han ohi dituzten orduak errespetatzen ditugu.

Jai goiz arruntetan taldeko zortzi txistulariak ibiltzen gara, besterik gabe. Eta batzuetan, bestelako kontzertuak ematen ditugunean, Santa Zezilian esaterako, Musika Eskolako ikasleak eta inguruetako txistulariak ere biltzen zaizkigu. Alborada bereziak, aldiz, festa apartekoetan jotzen ditugu, tronpeten laguntzaz, era horretan indar handiagoa hartzen dutelarik."

Konstituzio plazako eguerdietako kontzertuak

Donostiako txistulariek duten beste eginkizun bat igandero (kanpoan beste konpromisorik ez badute, behintzat, eta irailaren erdialdetik uztaileko azken igandea arte) ematen dituzten kontzertuak dira. Konstituzio plazan izan ohi dira, Udal Liburutegiko arkupeetan, eta eguerdiko hamabiak eta laurdenetan hasi eta ordu bata aldera bukatzen dira. Bataz beste, ez baita erantzun bera jaiero jasotzen, arrakasta polita dute eta jendeak gustuz hartzen ditu.

Horietaz gain, kontzertu bereziak ematen dira plazan, egun jakin batzuetan. Hona horietako batzuk:

• Artzain eta Inudeen Konpartsaren pregoia.
• Euskal Inauteriei eskainitako kontzertu berezia.
• San Ignazio. Bidaia musikala Gipuzkoan barrena.
• Aste Nagusiaren hasiera. Euskal Herriko beste txistulari askorekin batera, Kontzertu Nagusia.

Kontzertu didaktikoak

Donostiako Udalaren Txistulari Banda aitzindari izan da kontzertu didaktikoen arloan. Hogei urte baino gehiago daramatza lan horretan eta, urtero, ikasleen adinaren arabera egokitutako kontzertuak eskaintzen dizkie ikastetxeei, tradiziozko euskal musika eta, batez ere, txistuarena ezagutzen eta maitatzen has daitezen.

Bestelako kontzertuak

Hainbat erakunde eta musika antolakundek urtero eskatzen diote Udal Txistulari Bandari beren ekitaldietan parte hartzeko. Kontratazioa Musika Eskolaren bitartez egiten da nahi duenak web orri honetan bertan dauka harremanetan jartzeko aukera.

Protokolo saioak

Udalaren Txistulari Bandak betetzen dituen lan garrantzitsuenetako bat Donostiako Udalak egiten dituen protokolo saioei itxura ematea da (harrerak, inaugurazioak, dominak ematea...). Horrelakoetarako, traje tradizional bat dago, bai eta protokolozko errepertorio tradizional bat ere.