Donostiako Udalak airearen kalitatearen jarraipen berri bat egin du Isuri Gutxiko Eremuaren inguruan, martxan jarri zenetik urtebete baino gehiago igaro denean. 2026ko lehen zortzi hilabeteei dagozkien datuek berriro ere hiriguneko airearen kalitatearen bilakaera positiboa erakusten dute, bereziki nitrogeno dioxidoaren (NO₂) kasuan, trafikoarekin zuzenen lotuta dagoen kutsatzaileetako bat baita.

Easoko estazioak, Isuri Gutxiko Eremuaren barruan kokatuta dagoen eta jarraipen hori egiteko erreferentzia gisa erabiltzen denak, 2026ko lehen zortzi hilabeteetan 15,99 µg/m³-ko batez bestekoa erregistratu du NO₂-ri dagokionez. 2025ean, berriz, 16,55 µg/m³-koa izan zen kopuru hori, eta 2021etik 2024ra bitartean 23,88 µg/m³-koa zen batez bestekoa.

Horrek esan nahi du NO₂ mailak %33 jaitsi direla 2021-2024 aldiarekin alderatuta eta, gainera, 2026an ere apur bat jaitsi direla aurreko urtearekin alderatuta.

Mugak ez dira gainditu

Nabarmentzeko beste datuetako bat NO₂ kontzentrazio bereziki altuak erregistratzen diren egunekin lotuta dago. 2026ko lehen zortzi hilabeteetan ez da gainditu Airearen Kalitateari buruzko Zuzentarau berriak ezarritako eguneko muga. Gauza bera gertatu zen 2025ean. 2021etik 2024ra bitartean, berriz, urtean sei gainditze gertatzen ziren batez beste.

Gainera, 2026an aztertutako hilabete guztietan NO₂ mailak 2021-2024 aldiko batez bestekoaren azpitik egon dira. García Villanuevak adierazi duenez, «ehunekoetatik harago, oso erraz ulertzeko moduko datua dela uste dut: Europako legedi berriak ezarritako mugak gainditzen zituzten balioak izatetik, mugen azpitik dauden balioak izatera igaro gara. Gainera, Osasunaren Mundu Erakundearen jarraibideetara hurbiltzen ari gara».

Bilakaera positiboa hiriko beste eremu batzuetan ere antzeman da. Ategorrieta eta Tolosa Hiribideko estazioek, biak trafikoaren kontrolerako erabiltzen direnak, NO₂ mailen jaitsiera ere erregistratu dute 2026an, aurreko urtearekin alderatuta. Nolanahi ere, bi estazio horietan jaitsiera ez da Eason bezain nabarmena izan 2021-2024 aldiko batez bestekoarekin alderatuta.

Partikula finenak ere hobetu dira

Txostenak airean dauden partikulak ere aztertzen ditu. PM2,5 partikulen kasuan, hau da, partikula txikienen kasuan, datuek beheranzko joerari eusten diote. Batez bestekoa 9,35 µg/m³-koa izan zen 2021etik 2024ra bitartean, eta 8,19 µg/m³-koa 2026an. Gainera, 2026an ez da kutsatzaile horretarako erreferentziazko eguneko muga gainditu.

Tamaina handiagoko partikulen kasuan, PM10en kasuan, bilakaera irregularragoa da, meteorologiak edo Saharako hautsa iristeak ere eragina baitute. Aurten Saharako hautsaren hainbat pasarte eta tenperatura altuak eta prezipitazio gutxiko aldiak izan dira; egoera horiek airean partikula gehiago egotea eragin dute. Hala ere, 2026an erregistratutako batez bestekoa 2021-2024 aldiari dagokiona baino txikiagoa da oraindik.

Gainera, lehen zortzi hilabete hauetan egunez eguneko bi gainditze izan dira, 2021etik 2024ra bitartean urtean batez beste erregistratzen ziren sei gainditzeen aldean.