Donostiako Udalak, Hiri Mantentze eta Zerbitzuetako departamentuaren bitartez, esku-hartze bat egin du Egia auzoko Baztan kaleko 1. zenbakiaren parean irisgarritasuna hobetzeko.

Jarduketa nagusiari esker, 40 metro inguruko espaloia eta 110 m²-ko azalera duen zati bat berritu ahal izan da. Orain arte, baranda batek bi altueratan banatzen zuen eremu hori: barrualdea ez zen ibiltzeko modukoa, eta kanpoaldeak ez zuen nahikoa zabalera. Lanei esker, oinezkoentzako ibilbide erosoagoa eta seguruagoa eratu ahal izan da. Zoladura Donostia motako baldosa hexagonalez berritu da, dauden zuhaitzak mantendu dira txorko berriak eraikiz eta baranda berri bat jarri da. Goiko aldean dagoen egonaldi-plazan ere jardun da.

Era berean, behealdean dagoen belarriko zoladura berritu da, eta baldosa podotazil bat jarri da, ikusmen-desgaitasuna duten pertsonek errazago ikus dezaten pasabidea.

Oinezkoentzako pasabide berri bat

Jarduketa osatzeko, oinezkoentzako pasabide berri bat egin da Baztan kaleko 1 eta 2 zenbakien artean, bizilagunek eurek eskatuta.

Bidegurutzearen segurtasuna hobetzeko, galtzadaren bi aldeetan belarritxoak eraiki dira, eta gurutzatzen duten pertsonen eta inguruan dabiltzan ibilgailuen ikuspena areagotu da.

Jarduketak hainbat auzotan

Baztango esku-hartzeak bat egiten du Hiri Mantentze eta Zerbitzuek 2026an garatutako beste jarduera batzuekin, helburu berarekin: oztopoak kentzea eta auzoetako eguneroko ibilbideak hobetzea.

Besteak beste, hobekuntza hauek egin dira: Larratxon, espaloiak eta zoladurak berritu dira, eta adinekoen zentrorako eta Ostadarrerako sarbideetan oztopoak kendu dira; oinezkoentzako pasabide altu bat egin da, eta beste belarritxo bat jarri da Erregezaintzan, bidegurutzearen ikusgarritasuna eta segurtasuna hobetzeko; edo Pio Barojan eta Begiristain Doktorean egindako jarduketak egin dira, espaloi-zati batzuk berrituta.