Datorren ostiralean, abuztuaren 28an, Artikutzak berriro ospatuko du San Agustin eguna, Donostiako Udalaren jabetzakoa den enklabe honen egutegiko jardunaldi aipagarrienetako bat, hain zuzen. Egun horretan, finkak salbuespenez irekiko ditu ateak, euskal kulturaren, herri-kirolaren eta naturaren inguruko ehunka pertsona bilduko dituen jaieguna ospatzeko.

Artikutzako ateak 8:00etatik aurrera egongo dira irekita, eta sarrera librea izango da. Bisitariak bertara errazago iristeko, urtegia inguratzen duen pistan aparkaleku bat jarriko da, ibilgailuak bertan aparkatu ahal izateko. Gainera, egunean zehar bi txosna jarriko dira, janariarekin eta edariarekin, eta artisau-produktuak saltzeko eta erakusteko postuak ere egongo dira.

Programazioa 11:30ean hasiko da pilota-partidekin, eta norgehiagokak izango dira, bai emakumezkoen kategorian, bai gizonezkoen kategorian. 16:00etan, Alaia Martin eta Xabat Ilarregi bertsolarien txanda izango da; 17:00etan, berriz, herri-kirolen erakustaldi bat egingo da, non aizkolariek eta harri-jasotzaileek parte hartuko duten. Jardunaldiaren amaieran erromeria tradizionala izango da 20:00etatik aurrera, Itzal taldearen eskutik.

Artikutzaz gozatzeko egun bat

Urtero, San Agustin eguna aukera paregabea da Artikutzara hurbiltzeko eta Euskal Herriko naturgune berezi honetaz gozatzeko –Euskal Herrian ongien kontserbatuenetako bat da– . Goizuetako udalerrian kokatuta dagoen eta 1919az geroztik Donostiako Udalaren jabetzakoa den finka horrek 3.700 hektarea inguruko azalera du.

Mende batez baino gehiagoz, udal-kudeaketa estuki lotuta egon da bertako natura-baliabideen kontserbazioarekin. Artikutza erosi zen, hasiera batean, Donostiako ur-hornidura bermatzeko. Horren ondorioz, azpiegitura hidrauliko garrantzitsu bat garatu zen bertan, eta, aldi berean, neurriak ezarri ziren uraren kalitatea babesteko eta finkaren barruan jarduera jakin batzuk mugatzeko.

San Agustin eguneko ospakizunari esker, natura-ondare horretaz gozatu ahal izango da jai-giroan, eta, aldi berean, balioa emango zaio Artikutzaren, herritarren eta ingurunearen kontserbazioaren arteko harreman historikoari.

Jarduera-programa

11:30 | Pilota-partidak

Emakumezkoak

• Amaia Aldai - Larraitz Galardi
• Goiuri Zabaleta - Miriam Arrillaga

Gizonezkoak

• Oihan Etxeberria - Haitz Aranburu
• Xabi Salaberria - Eneko Zalakain      

16:00 | Bertsolariak

• Alaia Martin
• Xabat Ilarregi

17:00 | Herri-kirolen erakustaldia

Aizkolariak

•  Iker Vicente - Txomin Amundarain
• Ugaitz Mugerza - Arkaitz Etxebeste

Harri-jasotzaileak

• Mikel Lopetegi "Urra"
• Lierni Osa
• Maddi Gesalaga 

20:00etatik aurrera

• Itzal taldearen emanaldia