Garraio publikoa erabiltzea, estadiora denboraz joatea eta ostegunean arratsaldean zehar egin beharreko joan-etorriak aldez aurretik planifikatzea gomendatzen da

Donostiako Udalak, Real Sociedadek, Udaltzaingoak eta Ertzaintzak segurtasun dispositibo berezia koordinatu dute Reala eta PAOK Salonica futbol taldeek hilaren 30ean, ostegunean, 21:00etan Anoetako Estadioan (Reale Arena) jokatuko duten partida dela-eta.

Partidak nazioarteko izaera du eta horrek milaka zale erakarriko ditu, besteak beste, Greziatik iritsitako ia 1.500 zale. Hori dela-eta, dispositibo berezia antolatu da, hain zuzen ere, Amara Berri auzoko eta Anoeta inguruko trafikoari eragingo dion dispositiboa.

Horiek horrela, Ertzaintza, Udaltzaingoak, Donostiako Udalak eta Real Sociedadek hainbat neurri hartu dituzte ostegunean arratsaldean Anoeta inguruko sarrera-irteeretako segurtasuna bermatzeko.

Horren harian, udalaren eta segurtasun dispositiboaren arduradunek dei egin dute garraio publikoa erabiltzera eta ibilgailu pribatua ez erabiltzera estadio ingurura hurbiltzeko, izan ere, une batzuetan hainbat trafiko mozketa egin daitezke, besteak beste, estadiora taldeetako autobusen edo kanpoko zaleen iritsiera direla-eta. 

Aldizkako trafiko mozketak 18:00etatik aurrera

Hortaz, 18:00etatik aurrera trafikoa eten ahal izango da Urumea pasealekuan, Madrilgo hiribidean (Pio XIItik aurrera), Errondo pasealekuan (Portutxo plazatik aurrera) eta Zorroaga pasealekuan (Toribio Alzaga eta Aita Donostiaren artean). 

Era berean, arratsaldeko lehenengo ordutik ezingo da ibilgailu pribatuan Anoeta barrura sartu. Beraz, estadioaren inguruko kirol instalazioaetara (Izotz Jauregia, Karmelo Balda, Paco Yoldi, Antonio Elorza Belodromoa edo Josean Gasca kiroldegia) jardueraren bat egitera joan nahi dutenei ahalkoatzen zaie oinez edo garraio publikoan joatea. Baldin eta ibilgailu pribatuan joan nahi badute, Illunbe ingurura bideratuak izango dira eta bertan aparkatu beharko dute, ondoren GI-20 zeharkatzen duen oinezkoen pasabidetik Anoetako kirol eremura sartu ahal izango dira. 

Partida amaieran, ohi bezala, Aita Donostia plazaren inguruko trafikoa 15 – 20 minutuz etenda egongo da, Estadiotik ateratzen diren zaleen irteera arintzeko. 

Amara Berriko auzotarrak

Anoetako Estadioan (Reale Arena) Realak partidak jokatzen dituen gainerako egunetan bezala, 5-1 Amara sektoreko TAO baimena duten egoiliarrek, urtarrilaren 29tik 31ra, biak barne, libreki aparkatu ahal izango dituzte haien ibilgailuak 1-2 Erdialdea, 1-5 Morlans, 5-2 Loiolako Erriberak eta 5-3 Loiola sektoreetan. Sektore horietan, TAOko titularrei aplikatzen zaizkien baldintza berberak aplikatuko zaizkie.

Hala ere, egoiliar horiek ezin izango dute doan aparkatu nahitaezko ordainketa eremuetan (15 eremuetan), ezarritako erregulazio ordutegiaren barruan.

Dena dela, segurtasun arduradunek partidara joango diren zaleei eskatu diete, estadio ingurura ibilgailu pribatuarekin ez gerturatzeko, GI-20 eta GI-40 bezalako ordezko bideak erabiltzeko eta egingo diren joan-etorriak denborarekin planifikatzeko.

Beste neurri batzuk

Gainera, egun osoan zehar Ertzaintzak eta Udaltzaingoak euren presentzia areagotuko dute hirian eguneroko ohiko jardueren eta partida aurretiko giroaren arteko bizikidetza bermatzeko. 

Era berean, gogorarazi dute kirolaren bortizkeriaren, arrazakeriaren, xenofobiaren eta tolerantzia ezaren aurkako Legeak  kirol-instalazioetan edo inguruetan bengalak eramatea edota erabiltzea debekatzen duela, eta bide publikoan erabiltzeak ere Hiri Segurtasuna Babesteko Legea erabilita zigortu daitekeela, betiere baldin eta arau-hauste penalik ez badago.